Қаңтар 16, 2012 – 1 ақпан Атырау қаласы мен Жылыой ауданында «Теңізшевройл» ЖШС демеушілігімен, Атырау Облыстық және Қалалық білім беру бөлімдерінің, Жылыой аудандық білім беру, дене шынықтыру және спорт бөлімінің және Ғ.Сланов атындағы Облыстық ғылыми әмбебап кітапханасының қолдауымен «Ақпараттық Технология Дәуірінің Ұстаздары» атты жаңа бағдарлама іске қосылуда. Жоба Атырау қаласының және Жылыой ауданының оқытушыларын компьютер сауаттылығына үйретуге бағытталған. Жобаның басты мақсаты білім беру жүйесін жетілдіру және дамыту үшін мұғалімдер мен кітапханашыларға Интернетті популяризациялау, сонымен қатар, мемлекеттік тілдегі веб-контентті дамыту, ғаламтордың қолданушылар санын арттыру болып табылады. Жоба бір жылға есептелген, бұл уақыт ішінде барлық мұғалімдер терең білім алып, жоба аясында жүргізілетін әр түрлі конкурстарға қатысады. Сондай-ақ, жазғы уақытта ақпараттық технология бойынша тереңдетілген курстан өтуге бағдарлама қатысушылары арасынан ең жауапты және белсенді финалисттер таңдалынады.